Nakatabang na sa kapwa, nakatabang pa sa orug na pagpagayon kan Siyudad nin Naga.

        Mga karahayan na naginibuhan ni Victor P. Bichara, Jr. (“Jun” Bichara), general manager kan Victor Bichara and Sons, na kaipuhan masambitan ni Vice Alcalde Gabby H. Bordado sa saiyang pagsalingoy sa nakaaging aldaw kan Maogmang Lugar.

        Taon 1948 kan an mag-agom na Don Victor Bichara, Sr., asin Dona Emily Panayotti buksan an telon kan sadiri nindang Bichara Theater sa kinamumugtakan kan sinehan ngunyan: Calle Heneral Luna, Siyudad nin Naga.

        Alagad poon pa kan taon 1923 igwa na nin sine an mga Bichara: an Cine Bichara, sa parehong lugar na Calle Heneral Luna.

        Kabakas an duwang tugang ni Don Victor, Sr. na sinda Juan asin Miguel, an sine, “silent movies”: sine na dai nagtataram pero igwa nin live background music hali sa violin na tinutugtog ni Armando Medina.

        Taon 1930 kan mag-igwa na nin “talkies”, sine na nagtataram, an mga Bichara. Alagad igwa nin kalaban: an Cine Mabuhay kan Insik na si “Sayok”.

        Taon 1939 kan magka-igwa na naman nin saro pang kalaban an Cine Bichara: an Naga Theater ni Luis Los Banos sagkod magputok na an guera.

        Sagkod yaon an hapon igwa nin pasali an Cine Bichara, kabakas man giraray an sarong tugang ni Don Victor, Sr.: Si Miguel.

        Mga 1970’s na kan mabuhay asin magka-igwa nin juridical personality an Victor Bichara and Sons kaibahan bilang mga incorporators an doseng aki kan mag-agom na Bichara na iyo sinda: Alfredo, Alfonso, Susana, Jaimito, Benjamin (Gogo), Miguel, Milagros, Julia, Emily, Esther, Victor, Jr., asin Alex: Pitong lalaki asin limang babae: an mag-agom dai pa kaidto nag-aaram kan family planning ni Congressman Edcel Lagman!

        An mag-agom na Bichara mga immigrant sa Pilipinas: Si Don Victor, Sr. hali sa Beirut, Lebanon; asin si Dona Emily taga Bethlehem, kataid sana an harong kan Church of Nativity, an lugar na kinamundagan ni Hesukristo.

         Sa lindong kan Victor Bichara and Sons yaon an moviehouses na Bichara, Alex, Vic, Emily asin Advent.

         An mga sinehan sa luwas kan Siyudad nin Naga na midbid na sa mga Bichara pagsadiri asin registrado sa mga aki na lalaki ni Don Victor, Sr.:

         Alfredo: duwa (2) sa Larap, Jose Panganiban asin Imelda, Camarines Norte; Alfonso: apat (4) sa Daet, Camarines Norte, duwa (2) sa Ligao, Albay, duwa (2) sa Iriga City, duwa (2) sa Polangui, saro (1) Daraga, Albay, asin tulo (3), Legaspi City; Jaimito: apat (4) sa Calabanga, Tigaon, Goa, asin Buhi, Camarine Sur; Benjamin (Gogo): tulo (3) sa Pili, Sipocot,asin Pasacao Camarines Sur; asin Victor, Jr.: apat (4) sa Libmanan asin Bato, Camarines Sur, Tagkawayan, asin Guinyangan, Quezon; Alex: AB Minimart.

         Sa Victor Bichara and Sons magayon asin tuninong an padalagan kan negosyo; kuntento an mga empleyado, dai nin reklamo; “picking apples” sa delihensya an haros gabos na sinehan; asin dai nag-iiriwal an mga magturugang.

         Nagtatao nin tultol na sweldo kaya nakakapamili nin mga empleyado: idtong may kalidad asin abilidad.

         Bantug-bareta na harong nin mga tisay asin pang-beauty pageant, an mga lady employees maluluma sa gayon an mga kandidata sa Miss Bicolandia.

         An duwang respetadong gurang tuninong na nagpaaram na sa kinaban: Si Don Victor, Sr., kan taon 1961sa edad na 70 anyos: asin si Dona Emily kan taon 2000 sa edad na 97 anyos.

         Sabi ngani kayan: life must go on maski dai na an iginagalang na mga magurang.

         An mga magturugang burugkos asin borunyog, padagos an negosyo, respetado kan banwaan.

        Si “Jun” Bichara suportado pa man guiraray kan mga tugang bilang general manager kan Victor Bichara and Sons.

         Inspirasyon ni “Jun” Bichara an saiyang agom na si Consuelo Centenera, ina nin tulong aki, saro sa mga founder asin kagsadiri kan bantug-bareta na Bigg’s Diner.

         Alagad arug kan nangyayaring pag-collapse kan mga negosyo sa America sagkod sa Europa, nagka-igwa man nin problema an Victor Bichara and Sons: nagbawas an nagdadalan nin sine sa mga sinehan!

         Nagin makusog na kalaban an mga TV Network na ABS-CBN asin GMA kun sain i-pinapasali haros baynte kwatro oras aro-aldaw an mga tele-serye, tele-nobela, game show, sit com, news asin current affairs.

         Sa mga Cable Network man naka-exhibit an mga foreign pictures, an boxing, NBA sports asin reality shows.

         Nakadagdag pa an mga VCD asin DVD na nababakal sa mga sidewalks, barato: P 50 kada saro ta mga pirated.

         May veces mas dakul pa an nalaog sa sine na naka-passes kaysa sa takilya natubos nin ticket.

         Dai itinuga ni “Jun” Bichara kun sairisay an mga passes holders, alagad an tsismis: mga kapamilya kan mga taga BIR, NBI, Police, City Hall, SSS, DOLE, DTI, asin mga taga media.

         Kinunsulta ni “Jun” Bichara an mga tugang, nangurog na si “Gogo”, kun ano an option na dapat gibuhon tanganing mahipnuan an nawawarang income. An napagkasararuan: I-pundo an exhibition nin mga pelikula asin i-convert an mga sinehan sa for rent na pwesto nin negosyo.

         Pronto: an pagsara kan haros gabos na sinehan iyo mismo an ginibo ni “Jun” Bichara.

         Pinag-renovate an mga sinehan, pinagbaduan nin bagong pintura na kolor psychedelic na kabaing nin disneyland:

         Sa Bichara Theater building pinag-retain sa third floor an Bichara Cinema 2; igwa nin Centrowalk: Bichara Mall, level 1 and level 2, sa first floor asin second floor; sa under ground, an Divisoria Mall; dakulang portion kan Bichara building an okupado kan McDonald’s; sa palibot magagayon na mga tindahan.

         Sa Emily Theater building, pinag-retain sa second floor an Emily Cinema; an first floor iyo an Emily Arcade na pano nin mga bagong negosyo.

         An Alex Theater building pano nin bagong tindahan na an mga kagsadiri hali pa sa Manila an kadaklan.

         Okupado kan saro sanang negosyo an Vic Theater building: Novo’s Jean’s and shirt’s.

         Plano ni “Jun” asin “Gogo” Bichara na bukasan liwat an Advent Theater katabang na panlaban sa apat na cinema na bubukasan sa ginigibong SM Mall sa CBD II.

         Dangug niyamo kuntento si Mayor Jessie M. Robredo sa ginibo ni “Jun” Bichara asin mga tugang sa Victor Bichara and Sons. Orug na naggayon an hitsura kan Commercial Business District I (CBDI), nagdagdag an negosyo sa centro dara kan itinaong opurtunidad ni “Jun” Bichara sa mga kagsadiri nin negosyo na magkaigwa nin primera-klaseng pwesto nin tindahan.

         Orug nang maogma si “Jun” asin “Gogo” Bichara ta relaks na, dai na nagngungurot. Pirmi na sanang naka ngirit. Sagkod sa duwang talinga pati an pagngirit kan duwa!

         Si “Jun” Bichara na kaidto star player kan La Salle Green Archer sa NCAA asin Puyat Steel kan MICAA, binalikan an saiyang “first love” na basketball. Bako na magkawat kundi bilang coach/manager kan Camarines Sur Hi Basketball Team, na ngunyan nanginginutan sa standing kan on-going na Congressman Luis R. Villafuerte Cup kan second district.

         Go,go,go…Victor P. Bichara Jr., Go!