Calabanga, Camarines Sur – An Casureco II Consumers Group (CCG) sa pag-andam kan bagong matukaw na miembros kan junta directiva na halion sa puesto si Jane Barrameda bilang OIC General Manager, naghurot na sa National Electrification Administration na nombrahanda siya na maging permanenteng GM.
Ini apesar na nag-aatubang sa controvercia an manijamiento sa pag-deposito kan coleccion na Php5.6 milliones sa G7-bank asin kabali an Php2 milliones na pig-deposito pa giraray sa sinambit na bangko apesar na perang aldaw masara na sagcod na pig-take over na kan PDIC.
Si Dr. Domingo Yu, dating board presidente kan Casureco II asin pamayo kan CCG nagconfirmar sa Bicol Mail na sainda nang pighurot ki NEA deputy administrator Pablo Pan na nombrahan na si Barramenda nganing maging permanenteng GM.
An lakdang na ini bilang anticipacion sa magiging accion kan bagong composicion kan junta na posibleng halion an OIC GM.
Si director Francis Soler kan Naga North District na bestadong kaalyado kan bagong matukaw na mga director na sinda Msgr. Zosimo Sanado, Emmanuel Rojo asin Tomas De Vera, nagpahayag na mayong katutoanan an sahot na iyan kan dating board president huli ta dai man ngani sinda nag-oorolay kan bagong mga director sa pagpatalsik ki Barrameda bilang OIC GM.
An mga critico ni Barrameda nagsabi na an pagpadalagan kan OIC GM kan cooperativa daing gayo makabuelo huli ta kapot siya nin politico sa Camarines Sur, alagad ini saiyang pigpapahimotikan.
Pigpaliwanag ni Yu na an saindang lakdang na maging permanenteng GM si Barrameda afuera kan enot na mga dahilan huli kan saiyang marhay na performance mala ngani sa laog na nin duwang bulan nakabayad na nin amay sa power bill sa National Power Corporation sagcod na naka-aprovetsar kan tres por cientong prompt payment discount.
Naglangkaw na an collection efficiency asin si problema sa systems loss napahuros na hali sa dating 21 por ciento naging na sanang 17.67 por ciento.
Mientras tanto, sinabi pa kan pamayo kan CCG na pig-confirmar na ni Pan na mapadara nin evaluation team hali sa NEA central office nganing adalan an recomendacion kun dapat paboran asin helingon an mga controvercia kun may kapabayaan an manijamiento kan OIC GM.
