Libmanan, Camarines Sur – An National Electrification Administration (NEA) mabilog nin Task Force Audit nganing investigaran an nawawarang Php40 milliones na coleccion kan Camarines Sur I Electric Cooperative (Casureco I) Inc. na pigtutubodan kan panahon ni dating General Manager Francisco Quiñones asin OIC GM Josephus Motos.
Si NEA Administrator Edita Bueno iyo an nag-anunciar kaini kan Septiembre 4 sa atubangan kan mga oficiales asin empleados kan Casureco Uno kan saiyang visitahon an NEA management team na nagpapadalagan kan cooperativa.
An pagcrear kan task force matapos mag-report si Acting General Manager/Project Supervisor Charito Mabitazan, namamayo kan NEA management team na nadiscobre an dakulang discrepancy sa libre de cuenta kan cooperativa na cantidad Php40 milliones.
Kabali sa dahilan iyo an dai pag-remiso kan ibang empleados kan coleccion, arog kan ibang sub-office na dai pig-remit sa main office si coleccion na 300 mil pesos, alagad dai paman nginaranan ni Mabitazan an envueltong empleados. Nagkapera pang cuestionableng transaccion kan mga oficial na dapat ma-investigaran kan task force.
Huli kaini, afectado an collection efficiency dawa na ngani naglangkaw na ngonian na panahon kan NEA management team.
An NEA Administrator naglibot sa nagkaperang mga cooperativa nin corriente sa Camarines Sur nganing personal na maaraman an kamugtakan asin sagcod na saiyang pig-angat an manijamiento na dapat mapalangkaw na an categoria.
An grupo ni Mabitazan, sobra na sa sangatos dias sa pagpadalagan kan cooperativa asin saiyang pig-implementar an mga reforma nganing mapalangkaw an collection efficiency asin mapababa an systems loss.
Namemeligro an envueltong empleados asin oficial kan cooperativa na sangatan nin caso administrativo kun sinda maprovaran na piglostay an cuarta.
Mientras tanto, pig-anunciar na ni Bueno na sainda nang inaprovaran an pagpalawig liwat nin sagcod sa sangatos dias an servicio kan NEA management team nganing ipadagos an mga pig-iimplementar na reforma.
Kan mga nakaaging administracion nalulugi nin sagcod sa dos milliones pesos sa cada bulan huli kan problema sa collection efficiency asin systems loss. An naging accion kan NEA kapotan an manijamiento asin an pigsubol an grupo ni Mabitazan.
Suportado an saiyang manijamiento mala ngani an junta directiva iyo an nagpasar nin resolucion na naghahagad sa NEA na e-extendir pa nin panibagong l00 dias an saindang termino.
