Si OIC GM Jane T. Barrameda kan Camarines Sur II Electric Cooperative (Casureco II) Inc.pabor na suspendiron an implementacion kan controvercial na Power Bill Deposit (PBD) sagcod na inangat an iba pang mga Sanggunian Bayan na magpasar nin resolucion na naghuhurot sa Energy Regulatory Commission (ERC) nganing igilid an implementacion kaini.

        Nagpahayag nin kaoogmahan si Barrameda sa pagpadreno ni Consejal Maria Elizabeth Lavadia nin resolucion sa Sanggunian Panlungsod kan Ciudad nin Naga sagcod na pigpaboran kan miembros kan consejo an kahagadan sa ERC na suspendiron an implementacion kan PBD.

        Sa entrevista kan Bicol Mail, sinabi kan OIC GM na dakulang tabang saiya an resolucion kan SP sa Naga para dai siya macastigo kun dai iimplementar an reglamento kan ERC, huli kaini saiyang inangat an iba pang mga Sanggunian sa Camarines Sur na magpasar nin kaparejong resolucion nganing tambakan nin kahagadan sa ERC.

        An sinambit na resolucion nag-aapelar man sa iba pang mga Sanggunian nganing ipaheling an pagkakasaro kan consumedores contra sa bill deposit.

        Kun tugotan kan ERC an mga kahagadan kan consumedores dai ako macacastigo, sabi pa ni Barrameda, alagad an sinambit na agencia an mayo pang kasimbagan.

        An resolucion kan SP kan Naga, pigpadara na sa ERC asin liwat pang nagpasar nin resolucion na naghahagad sa board of director na suspendiron an implementacion kan PBD.

        Kan maconduciran nin suhay na entrevista kan BM si NEA Administrator Edita Bueno, sinabi kaini na mag-dedefende na sa junta directiva kan Casureco dos kun saindang papaboran an kahagadan na suspendiron an PBD, alagad nagpatanid huli ta kasugoan kan ERC igwang magkakanigong penalidad an pueding sapoon kan mga oficial kun masinutil sa dai pag-implementar kaini.

        Dinagdag pa kan OIC GM na an pagpaluwas niya nin memorandum ini base man sana sa guidlines sa pag-implementar kan Articulos 7, 8, 14, asin 28 kan Magna Carta for residential electricity consumers,

        An PBD aplicable sa gabos na new connections asin naputolan nin corriente. Obligado an bagong consumedores na magdeposito kan estimated billing para sa sarong bulan asin si napulotan dapat antes i-reconnect an corriente magdeposito kun pera si cantidad na consumo kan pinakahuring electric bill.

        An bill deposit magkaka-igwa nin interest per anum susog sa interest rate para sa savings deposit na aprovado kan Bangko Sentral ng Pilipinas.