Ilalansar kan Family Ministry in Caceres (FMC) sa Ciudad nin Naga an signature campaign contra sa Reproductive Health bill na pinapadrenohan ni Congresista Edcel Lagman, kasabay kan pigtalaan na prayer rally ngonian na aldaw sa Plaza Quezon.
An lakdang na ini pigponan na sa Archidiocese of Manila sagcod na pigsugo an gabos na mga kora paroko asin chaplains kan arkidiocecis.
Labanan nin ferirmahan an controvercial na bill kasunod kan ginibong paglansar nin signature campaign kan Reproductive Health Advocacy Network, sa paagi kan saindang organisacion, na Democratic Socialist Women of the Philippines (DSWP), na nag-iniciar kan on line petition nganing makatipon nin milliones na ferma pabor sa House Bill kan Bicolanong congresista.
Dawa na ngani igwang organisacion nin kababaehan an nagsusuporta sa bill ni Lagman, alagad mayong kaparehong grupo nin kababaehan digdi sa Bicol an naglangtad nin suporta sa Bicolanong diputado.
An Pro-Life and Pro-Family, mga organisacion asin moviemiento sa Arkidiocesis nin Caceres iyo an activong nagsusuporta sa pagbasura kan reproductive health bill.
Si Padre William Santiago, pamayo kan FMC kan Arkidocecis nin Caceres pig-anunciar sa ginibong press conference sa Penafrancia Basilica and National Shrine na preparado na an simbahan asin manlaen-laen na organisacion, kabali an mga escuelahan na maparticipar sa prayer rally ngonian na Septiembre 11.
An actividad masikad alas 3:30 nin hapon sa paagi nin serina nin fire truck bilang signal nganing an mga participanteng escuelahan sarabay na magpasiring sa Plaza Quezon.
Pag-alas 4:00 nin hapon maduhol nin mga testimonia kan dapit sa reproductive health asin magkaka-igwa nin pagsulo kan epigy na may kapot kan House Bill kan Bicolanong diputado.
Alagad pig-asegurar ni Santiago na dai sinda magibo nin radical sa pagsulo nin epigy nin tawo envez ini sarong simbulo kan pagcontra sa bill.
Mientras tanto, an mga natipon na milliones na ferma kan mga simbahan ipepresentar sa Camara-Baja asin Camara-Alta mantang pighahalat an pagtalaan kan plenary deliberations kan bill sa Congreso.
