An dating cuarto distrito asin ngonian ika-limang distrito kan Camarines Sur iyo an may pinakalangkaw na numero nin registradong votantes na nag-abot na sa 229,325 sa total na 916,349ng votantes base sa record kan Commission on Election (Comelec). An distritong ini bestadong pugol kan mga Alfelor perang taon na an nakakaagi asin an pinakahuri iyo si incumbent Congressman Nancing Alfelor na nasa ika-tolo nang termino.
Si Abogado Noriel Badiola, Provincial Election Supervisor nagsabi na an sinambit na total na numero nin registradong votantes base sa ginibong Election Registration Board hearing kan Noviembre 16, 2009.
An CSur na dating apat na distrito ginibo nang limang congressional district susog sa Acta Republica 9716, alagad igwang pendienteng cuestion sa Corte Suprema huli ta dai nagsunod sa 250,000 na population requirement nganing magcrear nin bagong distrito. Sa limang distrito an bagong premir distrito igwa sanang 176,383ng populacion.
An bagong ika-apat na distrito (Partido area) iyo an nagsunod may total na 208,467. Sobra na sa sangatos na taon kapot kan mga Fuentebella an distrito asin an pinakahuring nagkakapot kan distrito iyo si incumbent Congressman Arnulfo Fuentebella na enot nang nagtapos kan tolong termino asin ngonian pasiring naman sa liwat na ika-tolong termino.
An tercer distrito ngonian na dating segundo distrito igwang total na 206,993 votantes na duwang termino nang pugol ni Congressman Luis R. Villafuerte. An bagong segundo distrito na yaon ngonian sa poder ni Congressman Dato Arroyo igwang 148,451 na votantes asin an bagong premir distrito igwang 96,503 votantes.
An orihinal na premir distrito nabanga sa duwang congressional district huli kan reapportionment (RA 9716), alagad nakabali sana sa bagong segundo distrito hali sa dating segundo distrito iyo an banwaan kan Milaor asin Gainza.
An sinambit na distrito dating nasa poder kan mga Andaya asin pigpasa ki Arroyo kan mag-atras na magcandidato si Mrs. Marisa Andaya kan May 2007 election karibay kan nombramiento bilang DBM Secretary ni dating Congressman Rolando Andaya Jr.
An Camarines Sur igwang 1,063 na mga barangay kabali an Ciudades kan Naga asin Iriga.
Sa record kan Comelec sa ginibong October 2007 Barangay and SK Election igwang total na 892,659 na total na registradong votantes, alagad an nag-abot sana sa 654,760 an nagvoto o 73.35 %.
