Nginisihan sana kan mga Provincial Prosecutors (PP) sa Luzon an pighahagad na suporta kan limang mga oficial kan Department of Justice na pinavacacion ni Presidente Gloria Macapagal-Arroyo na envuelto sa “Alabang Boys”.

        Si Provincial Prosecutor Agapito Rosales kan Camarines Sur asin Vice President for Luzon kan National Prosecutors League of the Philippines (NPLP) nagsabi sa entrevista kan Bicol Mail na “dai pueding madara sa mga pagsulot kan red arm bands bilang senyal kan protesta” sa pagpa-vacacion kan mga oficial kan DOJ sa kasugoan ni PGMA asin pig-implementar na ni Justice Secretary Raul Gonzalez kan Enero 12.

        Naghagad nin suporta an saindang pag-iriba sa Manila nagpara nin mga text message sa mga Provincial Prosecutors Office sige sana an ngisi, sabi pa ni Rosales.

        Kabali sa pigsugo na mag-indefinite leave iyo sinda Justice Undersecretary Ricardo Blancaflor, Chief State Prosecutor Jovencito Zuño, Senior State Prosecutor Phillip Kimpo, State Prosecutor Misael Ladaga asin Investigating Prosecutor John Resado.

        Sinabi pa kan bise presidente kan NPLP na digdi sa Camarines Sur dai man sinda nagsusuporta huli ta dai tubod kan protesta na madadara sa pagsulot kan red arm bands ngani sanang dangogon kan presidente. “Concerned iyan kan central office so far sa Camarines Sur mayong kaparejong caso”, sabi pa kan Provincial Prosecutor.

        Nagtutubod siya tama sana an accion ni PGMA nganing dai ma-influencihan ta nagcoconducir nin investigacion an NBI asin Ombudsman, out of delicadeza dapat lang mag-leave muna sinda.

        Dinagdag pa kaini, na maski sain na oficina kun igwang mga pagduda kaipuhan mag-vacacion nganing magkaigwa nin patas na investigacion huli ta an NBI sakop kan kan DOJ.

        Huli kan isyu sa Alabang Boys, an Regional State Prosecutors sa Bicol nagtalaan nin meeting kan mga procujurador sa rehiyon cienco na gigibohon sa Enero 15, 2009 sa Ciudad nin Legaspi. Napag-araman na kabali sa posibleng orolayan sa agenda iyo an pighahagad na suporta kan limang mga oficial kan DOJ na pigpasa- irarum sa indefinite leave.

        Sa Ciudad nin Naga, si City Prosecutor Romeo Tayo nagpahayag na dai sinda masuporta sa sinambit na protesta asin pueding mangyari sana kun igwang kasugoan an DOJ.

        Naging ugat kan controvercia kan pavoran ni Zuño an resolucion na nagbabasura sa caso sa ilegal na droga contra sa “Alabang Boys” na sinda Richard Broden, Jorge Joseph asin Joseph Tecson.

        An PDEA nag-aacusar na sinda nakarecibe nin report na cantidad 50 milliones pesos an karibay kan caso sagcod na dagos na binasura kan prosecutors an caso sa tulong mga jovenes na aki nin mga prominenteng persona.