An resulta kan survey, saboot, kan Social Weather Station (SWS) kan mga adults digdi sa Pilipinas sa pagtapos kan taon Dos Mil Ocho (2008) iyo an minasunod:

        Kadiit sana na numero an naogma nin huli ta igwa nin trabaho, bulanan an sweldo, may gana maski dai nin gibo, igwa nin bonus, may extra bonus, igwa nin incentive pay, asin year-end incentive pay, nangurog na an nagta-trabaho sa gobyerno, sa mga korporasyon na sadiri kan gobyerno, asin darakulang negosyo siring kan MERALCO asin CASURECO II.

        Dakul na numero an mapungao maski igwa nin trabaho ta contractual asin aldawan an sweldo, mayo nin gana kun dai nin gibo, arug kan taon Dos Mil Ocho (2008) ta dakul na aldaw an bakasyon sa kabutan ni Presidente Gloria Macapagal-Arroyo, kadiit an bonus ta sadit sana man an sweldo.

        An thirteenth month pay en vez cash, kun minsan hulugan, may veces man in kind: kun funenaria an negosyo, an bonus kan mga empleyado: kabaong, tanganing magin kwarta ipinapa-bargain; kun sakristan sa simbahan, an 13th month pay: sarong taon na Santa Misa para sa pamilya an itinatao ni Mamo, pero dai bali na, dakul man an kupit sa atang: kun poultry: manok na 45-days an bonus; kun tindahan nin dry goods: ibina-bargain na bra, palda, blusa, panty asin shorts; an iba: sardinas, bagas, noodles, relief goods, used clothing asin iba pa.

        Tambak na numero an nag-aaraso na an talinga sa dakulang anggot ta dai na nin bonus, mayo pa nin sweldo, ta dai ngani nin trabaho!

        Pag-abot kan bagong taon Dos Mil Nueve (2009), an naogma, mapungaw asin anggot nagkaigwa nin New Year’s Resolution o pagbabago.

        An New Year’s Resolution kan inot na grupo: maghigos asin mag-igot tanganing ma-promote, magdagdag an sweldo asin malangkawan an bonus.

        An saindang pamibi ma-retain si Gloria asin mga alipores kaini tanganing magdanay sinda sa paraiso; makabalik si Larry sa pagigin presidente kan CASURECO II sagkod si Jane sa pagigin OIC-general manager.

        An iniisip na pagbabago kan ikaduwang grupo iyo an doblehon an paghigos asin pag-igot tanganing ma-promote, magin bulanan na mga empleyado, may dagdag na sweldo asin bonus.

        An New Year’s Resolution o pagbabago kan ika-tulong grupo: triplihon an pag-igot asin paghigos na makakua tulos nin trabaho sa taon Dos Mil Nueve (2009)!

        Kun dai pa makahanap: magpatuka na sana sa halas!!!

        Happy New Year!!!