Ciudad nin Legaspi – An katorceng (14) pigdudahan na nakakamati kan Influenza A(HINI) virus sa Bicol anas mga balikbayan asin ini nakawarak na sa mga provincias kan Camarines Sur, Catanduanes, Sorsogon, Albay asin Camarines Norte afuera kan Masbate, alagad dai na pigmentionar kan DOH Bicol kun sain na mga municipalidad asin ciudad. Nagpoon an pagbilang kan numero na sus-pechado sa A(HINI) kan magkasurahay na nagpupuli digdi sa Bicol poon kan Mayo l asta kan Junio 30, sabi sa mga pahayag sa Bicol Mail ni Dr. Rose Rempello kan oficina rehiyonal kan DOH Bicol.
An iba gikan sa Estados Unidos de America, Australia, Japan, asin San Diego, California.
Sa katorceng paciente na nasa listahan kan inaapod na case under observation, walo an pigdeclara na kan DOH na negativo base sa resulta sa examinacion sa laboratorio kan Research Institute for Tropical Medicine (RITM) sa Manila, an apat yaon pa sa home quarantine asin si duwa na mga menor de edad pighahalat pa si resulta sa laboratory findings kan RITM.
Piglinaw kan DOH Bicol na sagcod sa ngonian mayo pang mga pigdudahan na paciente na positivo sa virus.
Sarong omboy na sampulong bulan iyo an pinaka-joven na paciente sa Bicol na pigdudahan sa virus, igwang 17 anyos asin an pinaka-gurang nag-eedad na nin 67 anyos.
Kun igwang nakaka-mating symptom sa laog kan inaapod na incubation period. an paciente pinapa-observaran tulos.
An DOH Bicol nagsabi na dawa na ngani naglalangkaw an numero kan mga suspechado sa virus alagad dai dapat ma-alarma an publico huli ta mayo pang positivong paciente.
An Bicol Medical Center sa Ciudad nin Naga asin Bicol Regional Training and Teaching Hospital sa Ciudad nin Legaspi iyo an pigdesignar kan agencia na dagosan kan mga pigdududahan na paciente antes idalagan sa RITM
An duwang hospital kan gobierno completo na nin mga personnel protection equipment para sa proteccion kan mga health workers sa direct contact sa infected patients. Confirmado kan DOH central office na padagos na paglangkaw an caso sa virus sa Filipinas kaya ngani an mga oficina rehiyonal pig-alerto ni Secretary Francisco Duque, III laban sa delicadong helang.
Si DOH Regional Director Nestor Santiago tulos nagbilog kan crisis management team kan bulan pa nin Mayo asin nagtatarabangan sinda kan Regional Disaster Coordinating Council sa pamamayo ni Director Raffy Alejandro.
