Ciudad nin Legaspi – Nagsakat na sa 104 por ciento kun icocomparar kan nagtalikod na taon an tourist arrivals sa Bicol asin dai afectado kun nagka-igwa nin mga warak-warak na mga positivo sa influenza A(H1NI) virus sa mga ciudades asin provincias kan kabikolan.
Piglalaoman pa an rinibong devotos ni Nuestra Senora de Peñafrancia na mavisita sa Ciudad nin Naga sa maabot na Peñafrancia fiesta.
Orogan talaga an Bicol, sabi ni Director Maria “Nini” Ravanilla kan Department of Tourism (DOT) kan maconduciran nin entrevista kan Bicol Mail sa paagi nin telepono huli sa pagtarabangan kan mga local na gobierno asin iba pang agencia na nagiging katuwang ninda nganing padagos na maglangkaw an numero kan turista.
An Camarines Sur asin Ciudad nin Naga iyo an nangengenotan asin nagsunod an Albay.
Si Director Nestor Santiago kan DOH Bicol nagpahayag na 41ng paciente an positivo sa virus susog sa laboratory findings kan Research Institute for Tropical Medicine, sinda hali sa mga provincias kan Camarines Sur, Camarines Norte, Albay, Sorsogon, asin Catanduanes afuera kan Masbate.
An DOH igwang mga ginigibong campania sa paglikay sa virus, alagad si mga naging positivo sa virus anas nang naomayan.
Nagtutubod an director kan DOT na pig-etsafuera sana kan mga turista an mga bareta dapit sa pa HINI virus sa Bicol.
Sa report kan DOT Bicol poon kan bulan nin Enero asta Junio ngonian na taon an tourist arrivals nag-abot na sa 1,292,482 kun icocomparar sa kaparejong periodo kan taon 2008 igwa sanang 633,532. Kun sa gross receipt nagsakat na sa cantidad na Php732,848,560, sabi pa ni Ravanilla.
Sa mga dayuhan na turista nangengenotan sa listahan iyo an gikan sa mga naciones kan USA, ika-duwa an Israel, si grupo kan survivor naghaloy sa Caramoan, Camarines Sur, ika-tulo asin bagong record sa DOT iyo an Malaysia, ika-apat an United Kingdom asin ika-lima an Australia.
An homa na pagtuga kan Volcan Mayon sa Ciudad nin Legaspi, dai man ini nakapadulag nin turista envez padagos logod nag-aarabot hali pa sa ibang rehiyon maging sa ibang nacion na gustong makaheling kun bangui ta nagluluwas an mga baga gikan sa bonganga kan volcan.
Pigdeclara na alert level 2 kan Philippine Institute of Volcanology and Seismology (Phivolcs) asin namemeligrong isakat sa alert level 3, segun ki Ed Laguerta, resident volcanologist.
An Camarines Sur Watersports Complex (CWC) sa Pili, Camarines Sur favorito na nin mga dayuhan na turista gikan sa manlaen-laen na naciones asin ini an dakulang contribuente sa Bicol sa paglangkaw nin numero kan turista.
