An local na gobierno kan Ciudad nin Naga, Metro Naga Chamber of Commerce and Industry (MNCCI) Inc, Liga ng Brgy. sa Camarines Sur asin iba pang sectores nagtatarabangan sa pagtipon nin mga donacion nganing magdara nin relief goods sa mga naafectaran nin tubig baha sa Metro Manila huli kan bagyong “Ondoy”.
Sinabi ni Alcalde Jess Robredo na cantidad 500,000 mil pesos an inaprovaran kan Sanggunian Panlungsod nganing itaong ayuda sa Sister City kan Naga na iyo an Ciudad nin Marikina na saro sa piglaptopan nin tubig baha. Ini bilang pagtanaw nin utang na boot huli ta an sinambit na ciudad nagpadara man nin ayuda financial sa Naga kan lamasahon man digdi nin calamidad.
An saindang Operation Center nasa Plaza Quezon asin dakul na an sinakong segundamanong gobing, bagas, delata, mineral water asin iba pang ayuda na digdi pigtitiripon nganing sararo sana an pagkarga sa truck pasiiring sa Manila ngonian na semana.
Si Abet Bercasio, presidente kan MNCCI nagsabi na kaibahan ninda sa grupo iyo an Naga City People’s Council, SK Federation kan Naga, Sanggunian Panlungsod, Universidad de Sta. Isabel, RMN DWNX, Koling Society, asin Bicolando artists.
Ipinahayag ni Bercasio na an saindang grupo naglilibot pa sa mga barangay asin ibang banwaan nganing hakoton an mga pigtataong relief goods kan namamanuan.
Naghiro tulos an MNCCI asin iba pang organisacion huli ta nakakaherak kan mga naging victima kan calamidad.
An suhay man grupo na naglansar nin Operation Center iyo an ABS-CBN, Kabalikat Civicom, Kabalikat Bicol, Ateneo de Naga University asin iba pang organisacion sa Camarines Sur.
Si Liga ng Brgy. President Glen Gontang kan CamSur nagtitipon nin mga donacion gikan sa mga brgy. kan 35ng municipio. An saindang oepration center pigbugtak sa Capitolio Provincial kan Pili, Cam. Sur
Sa Camarines Sur PNP Provincial Office, si Sr. Supt. Rodolfo Llorca, tulos nagpa-apod nin command conference sa mga jefe de policia kan 35ng municipios asin pigsugo na magbugtak nin Operation Center sa saindang mga Municipal Police Station nganing magtipon nin donacion na ipapadara sa Metro Manila.
An lima pang mga provincial director kan PNP sa Bicol naglansar man kan kaparejong operacion kan makarecibe sinda nin directiva gikan sa Camp Crame.
Sa Ciudad nin Legaspi, igwa nang mga organisacion an mapadara nin grupo nganing voluntad na magtabang sa naafectaran kan sinambit na calamidad.
Mientras tanto, sa oficina rehiyonal kan Department of Agriculture sa Pili, Camarines Sur mayong pig-report na dakulang destroso sa agricultura huli ta inabot sana nin signal no. 1 kan bagyong “Ondoy” an Bicol.
Kun igwa man naafectaran sa Bicol iyo an mga na-stranded na pasajeros na ma-viajeng dagat kan dai tugotan kan coast guard na nangyari sa Pasacao, CSur, asin Virac, Catanduanes.
