Ciudad nin Legaspi – Binasura kan oficina rehiyonal kan Civil Service Commission {CSC) an pigsangat na caso administrativo ni Alcalde Asuncion (Ava) V. Arceno kan Pasacao, Camarines Sur contra sa sarong empleada kan municipio huli sana sa pagpaluwas kan papeles sa allotment and obligation slip kan saiyang esposo sa duwang miembros kan Sanggunian Bayan asin sa privadong persona.
An casong Grave Misconduct and Conduct Grossly Prejudicial to the Best Interest of the Service contra ki Ms. Nancy Bulalacao. Administrative Assistant II, sa evaluacion kan records kan CSC mayong prima facie case sa caso asin ini dagos nang ibinasura kan Agosto 25, 2009 sa pinaluwas na decicion ni Director Cecilia R. Nieto.
Na enot kaini, an kaparejong caso na pigsangat ni Alcalde Arceno sa Provincial Prosecution Office kan Camarines Sur nagpaluwas na nin resolucion na ibinasura kan Marzo 5, 2009, na inaprovaran ni Provincial Prosecutor Agapito Rosales.
Sa decicion kan CSC pigbiklad na susog sa Articulo III, seccion 7 kan 1987 Constitution, na igwang deretso na maaraman kan tao an mga informacion o official records asin documentos, asin papeles sa ano man na transaccion kan agencia afuera sana kun ini may relacion sa national security and foreign affairs
An reclamo kan alcalde huli kan pagbalga kan Municipal Ordinance No. 12, s. 2002 (Seccion 171 kan 2002 Revenue Code) sa pagtao nin copia kan allotment and obligation slip and payroll sa sarong nagnga-ngaran na Ms. Cleo Ramos na dai nagcolecta nin kabayadan na P20.00 cada copia, pagbalga kan reglamento sa pagpalyar na dapat hagadan nin kasuratan si Ramos asin magkoa nin permiso asin pagtugot sa pamayo kan oficina kan arin man na copia na pighahagad.
Igwang maraot na katuyohan si Bulalacao huli ta si Ramos esposa kan nagsangat nin caso sa Ombudsman laban sa jefe ejecutivo local.
Si Bulalacao nagdemiter sa saiyang trabajo kan Mayo 21, 2008 bilang Acting Disbursing Officer kan Municipal Treasurer, kan LGU-Pasacao alagad ini dai inaprovaran sa surat petsado Mayo 23, 2008.
Saiyang pigpahimotikan an mga acusacion contra sa saiya. Siya nagpupugol kan puesto bilang administrative assistant II alagad pigdesignar bilang disbursing officer kan Oficina kan Tesorero kan LGU-Pasacao.
Pigpaliwanag na tinugotan niya sinda Municipal Councilors Junard Joel de Alday asin Jeff Lindsey Lee-Oliver na pasublion kan payroll ni Mr. Wilson A. Arceno, Municipal Administrator asin esposa ni Alcalde Arseno, asin an sinambit na payroll ipinasubli sa nagnga-ngaran na Cleo Ramos. Sinda igwa nang napugolan na photocopied.
Huli kan sinambit na incidente pigdestino siya kan alcalde sa Municipal Agriculturist Office nganing magtabang sa pag-andam nin mga proyecto, computer encoding asin project costing.
Dai siya pinasueldo kan Julio 2008 asin tinao sana kan Agosto 11, 2008 kan nagsombong sa Police Station na pinugol an saiyang dapat marecibing sueldo.
An isyu sa payroll consideradong documento publico asin an duwang consejales igwang diretso na maaraman an record publico. An respondiente dai na-informaran na an consejales nagpa-xerox kan sinambit na papeles.
Sa record kan caso si Tesorero Belmonte an immediate superior ni Bulalacao sa saiyang surat sa alcalde kan Mayo 20, 2008, na saiyang pigsubol an sinambit na consjales ki Bulalacao kan sinda maghagad kan documento durante sa ginibong regular session kan Sanggunian Bayan. Pigpaliwanag kan tesorero na practice sa saindang municipio na an oficiales local libre sa pagkoa asin paghanap kan records sa oficina.
