Nag-aandam an grupo kan anti-dam sa Sipocot asin Lupi, Camarines Sur nganing maglansar nin mga protest rally contra sa ano man na pag-provar na ipadagos an construccion kan controvercial na P1.9 billiones na Libmaman-Cabusao Dam (LCD) project sa Brgy. Malaguico, Sipocot, alagad mayoria sa mga afectadong familia na dating pusog na minacontra sa proyecto an na-convensir na kan Bicol River Basin Watershed Management Project (BRBWMP), nganing magbaliktad na kan saindang panindugan.

        Papangenotan kan Bagong Alyansang Makabayan asin manlaen-laen na organisacion kabali an grupo nin mga paraoma an maparticipar sa pigtalaan na protesta sa Sipocot, CamSur sa Sabado, Pebrero 20, 2010, asin pig-invitaran man si Nestor delos Reyes, candidatong congresista kan bagong premir distrito kan Camarines Sur.

        Afuera pa kaini, malansar pa nin mga protest rally sa premirong semana kan Marzo asin iba pang petsa kan kaparejong bulan

        Pig-oorganisar an mga participantes gikan sa mga banwaan kan Lupi, Sipocot, Libmaman, asin Cabusao sa mas dakulang protesta sa Abril 14, 2010 nganing ipaheling na dakul an dai uyon sa proyecto huli ta delicado sa tubig baha arog kan nangyari sa Northern asin Central Luzon kan nagtalikod na taon.

        An mga oficiales local kan Sipocot an nakatalaan na magparticipar huli ta sinda pusog na minacontra asin dai pa binabawi an resolucion na pighuhurot sa Malacañang na dai idagos an proyecto. Sinabi ni Consejal Manuel Chan, miembro kan Sanggunian Bayan kan Sipocot na sinda maparticipar huli ta mayormenteng afectado an saindang banwaan sa tubig baha kun marealisar an multi billion peso na proyecto.

        Si Vic Nierva, lider kan LupiKontraDam nagsabi na pig-aandam ninda an organisacion nganing ipaheling na dai pa sinda nagbabawi kan panindugan.

        Kun igwang naghahace nin protest rally, si Eduardo Yu parataram kan oficina rehiyonal kan NIA nagconfirmar na sa 83 na familia sa Lupi na afectado kan dam, 58 na an nagsusuporta na sa proyecto matapos ma-intindihan ninda an karahayan kan proyecto. Si mga afectadong familia nag-atendir sa lakbay aral sa Carcar, Cebu na kun haen si mga pig-relocate na familia nagpaliwanag kan resulta kan dam sa saindang provincia asin kun panong natabangan sinda kan gobierno.

        Si nagbaliktad iyo si nag-atendir sa ginibong consultacion sa Ragay, Camarines Sur kan nakaaging semana sagcod nag-organisar kan saindang Homeowners Association asin nagpili nin mga oficiales.

        Si Florecil Lirio iyo an presidente, Nancy Aliboro – bise presidente, mga director sinda Romel Asma, Beth Periras, Francisco Velarde, Alipio Velarde, asin Rechel Etorne. An organisacion nakatalaan na ipa-accredit sa Housing and Regulatory Board.

        An mga nagbirik nin panindugan nag-ako na kan pig-opresir kan BRBWMP na libreng 80 metros cuadradong lote asin harong, kabali na an itataong livelihood assistance.

        Mientras tanto, natapos na kan BRBWMP si ginibong socio economic survey sa pag-inventario kan propriedades asin si para sa relocation site kan afectadong mga familia.

        Napag-araman kun maresolveran na an mga ulang sa implementacion kan dam piglalaoman na babawion na kan oficina central kan NIA an pigsugong indefinite suspension kan proyecto.

        Pigbuyagyag kan BRBWMP na an dam project dai sakop kan election ban asin dawa anong bulan pueding ipadagos an construccion.