Igigilid muna kan local na gobierno kan Ciudad nin Naga an darakulang actividades sa Peņafrancia fiesta nganing tawan nin buelo an tercentenary celebration ki Nuestra Seņora de Peņafrancia sa maabot na bulan nin Septiembre asin iluwas an mga programa sa siyam na aldaw na novenario ki Ina.
Si Alcalde John Bongat nagpahayag sa entrevista kan Bicol Mail na kabali sa ilulowas iyo an beauty pageant na pigponan na kan nagtalikod na taon, paghali na kan conrovercial na street party asin iba pa, alagad an military parade pueding ipadagos sa laog kan Peņafrancia fiesta defende sa pinal na orolay kan Arkidiocesis nin Caceres asin kan City Hall. An voyadores festival kabali sa pigcalendariong actividades kan simbahan sa panahon kan fiesta.
Si Vicente Avila, pamayo kan Bicol Federation of Active and Reserve PMT Commandant and Instructors League, sinabi kaini na masunod sinda kun ano an magiging decicion kan duwang lado mientras na nag-aandam man an mga universidad asin colegio sa pagparticipar sa military parade.
Kan nagtalikod na taon naging controvercial an military parade huli kan panindugan kan Bicol Association of Catholic Schools na dapat iluwas na sa siyam na aldaw na novenario ki Ina an military parade sa dahilan na dai angay sa fiesta nin Peņafrancia. Mayong nangyari nagpadagos an parada huli ta dakul na mga escuelahan an nagparticipar.
Sa Septiembre 10, 2010 iyo an ika-300 na taon na devocion ki Nuestra Seņora de Peņafrancia na iyo dakulang ocacion na pig-andaman kan simbahan.
Pigconfirmar kan bagong magtukaw na jefe ejecutivo na nagtalaan sinda nin orolay ni Arzobispo Leonardo Z. Legaspi kan Caceres sa Julio 5 matapos kan inicial na orolay kan representantes kan simbahan asin City Hall.
Pighagad kan simbahan na sarahan sa trafico an mga lugar kan Naga Metropolitan Cathedral, Peņafrancia Shrine asin an Peņafrancia Basilica Minore nganing dai madesturbo an actividades digdi ki Ina. An bagay na ini segun ki Bongat icoconsulta muna sa Public Safety Office kan local na gobierno.
Nganing maging mahiwas an centro kan ciudad asin sa lugar kan mga actividades ki Ina, ilulowas na an parking area nin vehiculos sa Central Business District II asin sa City Hall. Madestino nin mga miembro kan PSO nganing mabantayan an nakagarahing sasakyan, sabi pa kan alcalde.
Bako lang rinibong devotos ni Ina an ma-atendir sa kapiestahan na hali pa sa ibang rehiyon asin nacion envez piglalaoman na mas mahibog an visitantes huli kan dakulang celeberacion sa Septiembre 10, 2010. Igwa pang mga visitang Obispo gikan sa manlaen-laen na naciones.
