Dato 'oragon' na sa CSur

PILI, Camarines Sur - Naging especial an regular na session kan Sanggunian Panlalawigan kan Camarines Sur kan Martes (Noviembre 30) kan saindang maging visita si Presidential son Diosdado Ignacio ‘Dato’ Macapagal-Arroyo nganing magrecibe kan award kan resolucion numerado 55 na mina-adaptar sa saiya bilang aki kan Camarines Sur.

Si Gobernador L-Ray Villafuerte asin Bise Gobernador Salvio Fortuno nag-orgullo kan pag-adaptar ki Dato kan gobierno provincial huli ta saiyang napiling lugar na digdi mag-adal sa colegio asin mag-estar sa brgy. San Felipe, Ciudad nin Naga.

Pigrecibe ni Dato an sinambit na award sa precensia kan mga miembros kan Sanggunian Panlalawigan asin dakul na mga visita asin kaibahan niya an saiyang esposa na si Maria Violeta Manotoc Arroyo.

Antes niyang pigrecibe an plaque si Vocal Waren Señar na iyo an nagpadreno kan resolucion na pigpasar kan junta provincial kan Septiembre 28, 2004, pigbasa sa session asin sa atubangan kan presidential son an katuyohan asin pag-orgullo kun tano ta saindang pig-adaptar na aki kan provincia nin Camarines Sur.

Sinabi man sa mensaje ni Dato na bilang aki na kan Camarines Sur saro na siyang “oragon” na saiyang pigbasa an preparadong mensajeng Bicol na kadakli an sustancia sa comedy.

Inako kaini, na favorito niya an kinalas asin log-log sa Bicol.

Nakikihalo siya fermi sa mga Bicolano nganing makaaram kan linguaje digdi sagcod na nakakataram na siyang Bicol.

An resolucion na pigbasa ni Señar saiyang pigsaysay na si Dato nakakatabang na sa Bicol sa pagcoordinar sa mga oficiales local asin agencia nacional nganing makadara nin mga proyecto sa provincia.

Bilang presidential son siya puedeng mag-acto na “world class salesman” kan Camarines Sur asin efectivong liaison ki Presidente Gloria Macapagal-Arroyo na saiyang ina.

Dinagdag paman ni Gobernador Villafuerte na si Dato matapos kan bagyong ‘Unding’ nagtabang na makapadara sa Camarines Sur nin helicopter asin gamiton sa paglibot sa mga banwaan nganing madarahan nin mga ayuda asin maheling personal an kamugtakan kan mga na-afectaran kan calamidad. Siya iyo pa an responsable nganing magvisita sa provincia si PGMA matapos kan viaje gikan sa Santiago, Chile sa pag-atendir sa APEC summit conference.