KMU nagprotesta contra sa DOLE

An crusada sa pangapodan sa gobierno kan sector nin obreros sa wage increase sa privadong sector asin empleados kan gobierno iyo an saindang katuyohan kan paglansar nin protesta sa atubangan kan oficina provincial kan Department of Labor and Employment (DOLE) sa Ciudad nin Naga.

Ini kasabay man kan mga ginibong protesta sa Metro Manila asin sa iba pang region kan Noviembre 30, sa pagrumdum kan kapangakian ni Andres Bonifacio na iyo man si envuelto kaidto kan crusada para sa pang nacion na democracia asin katalingkasan.

An protesta pinangenotan kan Kilusan Mayo Uno (KMU), Bagong Alyansang Makabayan, Bayan Muna, Gabriela asin iba pang mga militanteng grupo sagcod nang saindang pigkukurahaw an pagpatagbang sa puesto ni Secretaria Patria Sto. Tomas na pig-acusar na iyo an nag-orden sa militar para sa back to work order sa mga nag-jujuelgang mga trabajadores kan Hacienda Luisita sa provincia kan Tarlac.

Saindang pighuhurot an P125 na across the board salary increase sa mga empleados kan gobierno asin ini kan taon pang 2000 saindang pinaglalaban, alagad an gobierno ni Presidente Gloria Macapagal-Arroyo an bongod sa kahagadan na ini apesar kan mga pagralangkawan na kan mga mayor na producto sa mercado, flete sa mga pampasajerong sasakyan an sueldo na sana an pigbabaliwala kan Arroyo Administration.

Sa sinambit na protesta nangapodan sinda sa mga paraoma asin namamanuan kan Camarines Sur na: 1. Girumdumon si Andres Bonifacio asin tawan nin halaga an saiyang contribucion sa pangengenot asin pagtutulod nin katalingkasan sa pananakop kan kastila; 2. Ipadagos sa presente an saiyang mga kamawotan para sa tunay na pang nacion na democracia asin katalingkasan sa mga mananakop na dayuhan; 3. Ilantad an rurong kamugtakan ngonian kan mga obrero sa local asin enterong nacion; 4. kundenaron an madugong pagbongkag kan mga nag-juejuelgang obrero sa Hacienda Luisita, asin 5. Patalsikon si Labor Secretary Patricia Sto. Tomas asin an saiyang among na si Presidente Arroyo na sagad na sa pagiging maka-capitalista asin contra-trabajador.