LGU Pili, planong casohan vs PIWAD

An local na gobierno kan Pili, Camarines Sur nakatalaan na adalan an posibleng pagsangat nin accion legal contra sa manijamento kan Pili Water District (PIWAD) huli kan maating tubig digdi na pig-gikanan nin maabot sa 200 na mga paciente kan helang na tipos.

Si Bise Alcalde Ronald Boclot nagsabi na ini sainda munang pig-eestudiaran sa tahaw kan kahurotan kan nagkapera nang mga familia na victima kan tipos na mayong naitaong tabang financial an PIWAD apesar na an causa kan outbreak hali sa contaminadong tubig kan water district.

Alagad piglinaw kaini, sainda munang pigtatawan nin prioridad iyo an pagtabang sa mga paciente asin paghanap nin solucion huli ta parejo man sindang nasa gobierno asin an PIWAD.

Nagpaluwas nang 200 mil pesos na fondo an LGU sa pambakal nin mga bulong sa mga paciente huli ta afectado iyo an 21 sa 26 na mga barangay kan kabisera kan provincia nin Camarines Sur.

An PIWAD igwang coneccion nin tubig sa 5,200 na residential asin commercial consumers, dawa na ngani igwa nang ginibong mga accion sagcod na pagbugtak nin chlorine sa reservoir an mga namamanuan digdi dai pang tiwala sa kalinigan kan tubig.

An sadiring solucion kan mga residentes digdi iyo an pagbakal nin mineral water na iyo na ngonian an pigpipilahan sa centro commercial sagcod nang nakakaabot sa Ciudad nin Naga an mga taga Pili, Camarines Sur nganing magbakal nin malinig na tubig.

Maging an mga empleados kan PIWAD nagbabakal nin inumon na tubig na mineral water envez kan hali man sana sa saindang agencia.