PDCC, pig-alerto na ni Gob. L-Ray

AN Provincial Disaster Coordinating Council (PDCC) kan Camarines Sur sa pamamayo ni Gobernador L-Ray Villafuerte nagcrear nin multi-agency sa pag-andam kan provincia huli kan bagyong ‘Yoyong’ na nasa signal no. 2 an provincia sagcod kasobanggi nganing preparado sa ano man na mga emergencia.

An PAGASA an nagbandera kan mga provincias kan Kabikolan sa typhoon signal no. 2 asin ini pigpahayag na makusog an rapado kan duros kun magtama sa Kabikolan.

Alagad an PDCC nagpatanid magtama man o dai pig-alerto na ni Villafuerte asin an multi-agency componido kan PNP, Philippine Army, mga pamayo kan manlaen-laen na agencia de gobierno kan provincia, igwa nang pigdestinong ambulancia an capitolio nganing magamit ano man na emergencia.

Sa Ciudad nin Naga, si Alcalde Jesse M. Robredo an nag-alerto na kan saindang disaster council sagcod nang nagpatanid sa mga nag-eerok sa mga kababan na lugar na dapat amay nang mag-evacuar nganing makalikay sa ano man na mga accidente sa tubig baha.

Si Villafuerte asin Robredo an magkasuhay nang nagdesignar nin mga evacuation center kan mga residentes na ma-aafectaran kan bagyo na hali sa mga kababan na lugar.

Kan nakaagi pang Martes an duwang oficiales local na ini an amay nang nagpapatanid sa saindang namamanuan na mag-andam magtama man o dai an sinambit na makusog na bagyo mas marhay an paseguro bakong arog kan si nangyaring pagrapado ni “Unding” na nagkabirigla an mga taga Camarines Sur.

Mientras tanto, sa PNP provincial office si Sr. Suprt. Romeo Mapalo, provincial director kan policia digdi an pig-alerto na an mga jefe de policia sa pagtabang sa mga Municipal Disaster Coordinating Council.

Sinabi ni Mapalo na 24 oras na alerto sa calamidad an mga Municipal Police Station sa provincia.