Tubig kan PIWAD contamindao - DOH
Causa kan tipos

PILI, Camarines Sur - An pig-oorgullo kan Pili Water District (PIWAD) sa rinibong consumedores nin tubig digdi sa malinig asin makusog an bulos sa mga residencia asin commercial consumers, bakong aseguracion na malinig an tubig mala ngani pigconfirmar kan Department of Health na contaminado an tubig na posibleng gikan sa ati nin tao na iyo an causa kan paglangkaw kan casong typhoid fever kan bulan nin Octubre asin Noviembre asin pigconsiderar na ini saro nang outbreak.

Si Dr. Nestor Santiago, regional director kan DOH sa Bicol iyo mismo an nag-report sa mga oficiales local kan kabisera kan provincia sa ginibo nindang conferencia kan nakaaging Martes (Noviembre 30) asin sa pigsumiter man na report sa oficina ni Gobernador L-Ray Villafuerte.

Sa ginibong examinacion kan water sampling gikan sa PIWAD sa laboratorio kan Epidimiology sa DOH Bicol pigpahayag na positivo na contaminado an tubig kan water district na pigkoa ninda sa reservoir asin sa sarong gripo sa brgy. Cury, Pili, Camarines Sur mientras na sa ibang lugar na pigkoanan nin water sample an negative na, sabi pa ni Santiago.

An solucion kan PIWAD iyo an pagbugtak na nin chlorine sa reservoir asin sa iba pang burabod nin tubig digdi na posibleng gikanan kan sinambit na epedemia.

Sa entrevista kan media sa jefe kan DOH sa Bicol sinabi kaini na delicadong magka-igwa pang helang na cholera eltor kun dai naatisbaran an maating tubig kan PIWAD na nagcausa nin mga paglakop nin helang na tipos sa 21 kan 26 na mga barangay kan Pili.

Sa sinambit na conferencia sa presencia ni Alcalde Tomas Bongalonta nagka-surondo na isikwal na an barasolan enves magtarabangan na nganing maibitiran an paglakop pa kan sinambit na helang asin mala ngani sobra sa 200 an mga tinamaan kan tipos. Sa report sa oficina regional igwang 166 na caso, dai pa kabali si mga paciente na nagdalagan sa mga privadong hospital sa Ciudad nin Naga asin sa banwaan nin Pili.

Saro na an binawian nin buhay, alagad sa ngonian naghuros naman an paglangkaw kan sinambit na caso sa mga barangay enot na nagbungkaras an typhoid fever.

Nagpatanid man giraray an DOH nganing makaseguro na malinig an tubig inumon dapat pakalakagaon man giraray.

Inako ni General Manager Pablito Cunanan kan PIWAD an sinambit na report kan DOH, alagad an pigsasabing contaminadong tubig gikan sa salog na nasa brgy. Cury sakop na kan National Park.

An tubig digdi naagi pa sa saindang water treatment na iyo an pigkoanan nin water sampling kan DOH.

Duda an DOH na hali sa ati nin tao na nagdalihig sa reservoir kan PIWAD na iyo man an pagtubod ni Cunanan, alagad nagkaigwa na sinda nin mga ginibong paagi sagcod na an pagbugtak nin chlorine mala ngani naghuros na an casong tipos.

An pagkaigwa nin mga helang na tipos digdi nagpoon kan kapiestahan sa banwaan na ini kan Octubre 25, 2004 sagcod na saindang pigdeclara na igwa nang outbreak matapos maging positivo an 13ng mga paciente sa sinambit na helang.