SA GSIS NAGA BRANCH
Calamity loan suspendido
Sa 2ng LGU, mga NIA office, water district

AN Government Service Insurance System (GSIS) Naga Branch, nagpaluwas nang suspencion order sa nagkapirang mga agencia de gobierno kabali na an Local Government Unit (LGU) na dai makaka-aprovetsar kan mga benificios an saindang mga empleados huli kan dai pagremiso kan premium contributions sa laog na nin nagkaperang taon mala ngani inabot na nin milliones pesos an saindang morosidad.

Kabali sa suspendidong mga agencia asin LGU an saindang transaccion siring kan aplicacion sa salary loan, calamity loan asin iba pa iyo an mga oficina kan National Irrigation Administration (NIA) sa Daet asin Talisay parejo kan Camarines Norte, NIA Magarao, NIA San Jose asin NIA Libmanan kan provincia nin Camarines Sur, Tinambac Water District asin an LGU kan Balatan asin Presentacion.

Nag-aandam na kan mga papeles an mga empleados digdi sa pagsumiter kan saindang aplicacion sa calamity loan, alagad huri na nindang naaraman na an saindang agencia an dai na nagreremiso kan premium contributions sa halawig nang mga bulan.

Si OIC Branch Manager Angelina Garchitorena an dai paman makatao kan exactong cantidad kan mga morosidad sa premium contribution mientras na si empleada na nagkakapot kan record an dai naglaog kasoodma sa saindang oficina.

An provincias nin Camarines Norte asin Sur kabali sa pigdeclarang state of calamity huli kan naging destroso kan mga nakaaging bagyong “Unding” asin “Yoyong.”

Calificado an mga miembros kan GSIS sa calamity loan sa cantidad na diez mil pesos, alagad an sinambit na mga agencia asin LGU sagcod dai nagreremiso kan saindang premium contributions padagos pang suspendido an pag-aprovetsar kan calamity loan.

Igwa nang memorandum si Pres/Gen. Manager Winston Garcia sa pagpasunod kan calamity loan sa mga lugar na declaradong state of calamity, alagad an GSIS Naga Branch naghahalat pa huli ta si declaracion kan state of calamity sa Camarines Sur kan nakaagi pang Noviembre 19, 2004, mayo pa an pigsasabing guidelines hali sa GSIS central office.

-----------------------------------------------------------------------------------------------------ooOoo

TAGILID NA EDIFICIO KAN ELECTROMART - Habo pang i-condemned kan City Engineer’s Office kan City Hall dawa na ngani barang na kan publico an pagtagilid kan edificio. Si City Engr. Leon B. Palmiano, IV nagconfirmar na 12 pulgadas tabingi an edificio. Dai pigpakiaraman kan CEO huli kan certificacion kan Construction Engr. kan kagsadiri kan edificio na ini pusog pa harayo pa sa peligrong magrampahog.