Police sinaksak snatcher

SARONG suspechado sa mga casong snatching sa central business district 1 sa Ciudad nin Naga an sinangatan nang casong Homicide sa corte kan Naga City Police kan saksakon an sarong oficial kan PNP dai pa sana nahahaloy.

Si Allen Delumen, taga barangay Tabuco, Ciudad nin Naga enot kinasohan nin frustrated murder alagad sa ginibong preliminary investigation kan City Prosecution Office pigbaba si caso sa homicide huli ta dai man na-establiser kan nagreclamo na planong gadanon an sinaksak kaining awtoridad na si PO3 Henry Carmona kan operative division kan Sub-station no. 3 sa brgy. Tabuco.

Si 2nd Assistant Prosecutor Victor dela Cruz iyo an nag-investigar kan caso an saiyang recomendacion pagsangat kan casong homicide na pig-aprovaran ni City Prosecutor Noel Paulite, mientras na pigpako sana sa P14 mil an fiansa para sa temporariong libertad.

Alagad dai paman siya maarestar asin malaom sa carcel huli ta padagos pang naka-confined sa Bicol Medical Center nag-papaomay kan saiyang lugad sa likod kan badilon kan polis na naglapag sa saiya matapos enot na saksakon an victimang si PO3 Carmona.

An victimang polis sinaksak sa angog nin balisong kan suspechado kan Deciembre 3, mga alas 2:30 nin hapon mientras na pigdulok kan polis an duwa sa mga kaibahan ni Delumen na yaon sa laog kan trimobile sa pagduda na igwang maraot na plano sa mga nag-aaragi huli ta bistado na an grupo na envuelto sa mga casong snatching.

Pinaluwas ni Carmona hali sa laog kan trimobile an pigbistong si Adit San Luis sagcod na pigpa-itaas si bado asin naheling na igwa pang saray na t-shirt sa bulsa.

Si Delumen yaon sa gilid kan Mercury Drug Store sa canto kan Elias Angeles St. asin Ojeda IV na nag-agi sa likod kan trimobile na tolos nagbunot nin balisong sagcod na sinaksak si Carmona sa angog na sagcod sa ngonian naka-confined pa sa Mother Seton Hospital.

An victima nag-bunot kan saiyang 9-MM na badil, alagad naagaw asin pigprovaran na badilon si Carmona na dai nagputok an badil huli ta ini naka-lock. Nagharapagan bitbit an badil padulag si Delumen.

Nagresponde an miembros kan policia asin nagharapagan abot sa residencia kan suspechado. Pig-alok kan mga polis na magsuko na asin ibalik na an badil naglaban kaya napiritan an mga awtoridad na badilon sagcod nang tinamaan sa likod.