Huli sa 2nd Bagyo
SP naghagad suporta
sa mga NGO sa CSur

PILI, Camarines Sur - Naghagad na nin suporta an gobierno provincial kan Camarines Sur sa non- government organization (NGO) asin iba pang mga privadong sector sa provincia na magtao nin donacion sa mga naafectaran kan mga bagyong “Unding” asin “Yoyong”.

Si Vocal Ernesto Verdadero, chairman kan committee on information kan junta provincial nagpahayag na sa ginibo nindang session regular kan nakaaging Martes nagpasar sinda nin resolucion sa paghagad na nin suporta sa sinambit na sector huli kan mga sunod-sunod nang calamidad na nangyari sa provincia.

Dakulang bagay an ano man na mga donacion kan NGO asin iba pang privadong sector sa pagtarabangan kan gobierno asin privadong grupo, sabi pa kan vocal kan segundo distrito.

An gobierno provincial na tolos nagdeclara nin state of calamity matapos kan bagyong “Unding” kan Noviembre 19, 2004 nganing magamit an fondo sa calamidad kan provincia dawa na ngani naghiro tolos an mga oficiales local, alagad huli kan dakula na an destroso bako lang sa producto agricultura envez pati na an buhay kan ibang mga residentes na kun haen nagsakat sa 44 an mga binawian nin buhay huli kan duwang magkasunodan na bagyo.

Napag-araman na igwa nang privadong grupo an nagpahayag na nin pagtao nin mga donacion sa naafectaran kan mga calamidad alagad ini posibleng sa masunod na nin bulan nin Enero 2005.