Stocks nin NFA rice
sa CS nagparabawas

SI NFA provincial manager Bernardo Asetre nagbasura kan posibilidad na magkulang-kulang an stock nin bagas sa Camarines Sur matapos kan mga nakaaging calamidad asin 30 nang mga Local Government Unit (LGU) an nag-aprovetsar na kan rice loan sagcod na nag-abot na sa 21,521ng sakong bagas an na-idistrubuer sa mga LGUs.

Inako kaini, na dakula an nailuwas nindang bagas nin dai ngani maduwang bulan alagad ini madadagdagan an saindang supply huli ta igwang maabot na 550 mil sakong imported rice para sa region Bicol.

Igwa na sanang 45 mil na sakong bagas asin 14 mil na paroy an saindang stock sa bodega kan NFA.

An NFA iyo an agencia kan gobierno para sa food security orog na kun igwang calamidad na kaipuhan kan mga nagugutom na familia kaya ngani sa mga relief operation kan mga LGU an bagas gikan sa NFA.

Dinagdag pa kan NFA provincial manager nganing dai magparalangkaw an precio kan bagas sa mga mercado saindang pigdudugangan an pagpabakal nin NFA rice tanganing mamantenir an precio kan mga commercial rice.

Harayo paman na puedeng magka-igwa nin pagkulang kulang nin bagas sa mga mercado huli ta bastante pa an mga commercial rice.

An pighahaditan kan sinambit na agencia iyo an crisis nin bagas sa mga bulan nin Enero asin Febrero sa masunod na taon, alagad an programa ninda iyo an pag-angkat nin bagas nganing establi an supply sa mercado.

Si DA Secretary Arthur Yap an nagsugo na sa mga regional director orog na sa mga region na inagihan nin calamidad na ipasunod tolos an rehabilitacion sa pagtanum nin paroy sa paagi nin programa sa pagpa-utang nin banhi para makatanum nin paroy ngonian na bulan nin Deciembre.

Inako ni DA regional executive director Hector Sales na kun dai tolos makakatanum nin paroy fermi nang mababa an produccion nin bagas sa Kabikolan.