Pagsuspendi kan viaje
kan tren maglalawig

AN manijamiento kan Philippine National Railways (PNR) liwat naulang an plano na balik na sa regular na viaje ngonian na bulan nin Deciembre kan magka-igwa naman nin landslide sa relis kan tren sa provincia kan Quezon huli kan bagyong “Yoyong.”

Natatapos pa sana an paghali kan mga nakatahub na daga sa relis kan tren, alagad si DOTC Secretary Leandro Mendoza an nagsayuma pang magpaluwas nin orden sa PNR na ibalik na an regular na viaje ngonian na bulan mientras na entero pang pigririkisa an ginibong rehabilitacion sa linea kaini sa Padre Burgos, Quezon matapos mangyari an trahedya digdi kan Noviembre 12, sa viajeng Legaspi-Manila.

An Naga PNR Station an dai pa makataong exactong petsa kun noarin magiging normal an viaje huli ta magkaka-igwa muna nin orolay an mga miembros kan Board of Director nganing makaibitar sa posibleng trahedya.

Likay na an manijamiento sa nangyaring pagkadiskaril kan tren sa Padre Burgos, Quezon na kun haen 13 an mga binawian nin buhay asin 160ng mga pasajeros an iredo.

Si Mendoza an nakatalaan na magvisita liwat sa pigpakarhay na linea kan relis kan tren sa P. Burgos, Quezon antes magdecicion an manijamiento na magtugot na kan pagbalik ninda sa regular na viaje haling Bicol pasiring sa Manila.

Matapos kan sinambit na accidente mismo si Presidente Gloria Macapagal-Arroyo iyo an nagsugo na suspendiron an viaje sagcod na mayo pang aseguracion na libre na an posibleng mga accidente.

An gobierno igwa nang billiones pesos na fondo para sa total rehabilitation kan perokaril sa masunod na taon. Pigtalaan nang paharalion an mga squatters sa sakop na 15 metros na distancia hali sa relis antes magsikad an proyecto.