Pagrapado ni
"Unding"
P251.8M danyos sa agricultura
28 gadan, 15
nawawara
PILI, Camarines Sur - Naglawig nin sagcod sana sa apat na oras
si rapado kan makusog na duros kan bagyong “Unding” sa Camarines
Sur asin sa iba pang provincias kan Kabikolan, alagad dakula si
naging danyos sa mga producto agricultura na nag-abot sa P251.8
milliones.
 |
|
|
|
DESTROSO NI “UNDING” - Mga anihon
nang paroy sa Pili, Camarines Sur pinahapla kan bagyong Unding
(Itaas na retrato), dakul pang mga anihon na paroy sa Bicol an
nadestroso kan bagyo. Sa ibang retrato iyo an mga sinanup nin
tubig baha an mga tinanum na paroy sa Baao, Camarines Sur. (retrato
ni Jun Collantes/DA) |
|
|
|
|
Ini an pinakahuring report kasoodmang hapon kan oficina regional
kan Department of Agriculture (DA) sa Bicol asin ini componido kan
producto nin paroy, mais, fisheries, gulayon asin iba pa sa laog
kan nasa 25 mil na hectaria ng tanuman agricultura.
Si Ms. Emily Bordado, jefe kan Information Office kan DA sa Bicol
nagsabi na an saro sa may dakulang destroso iyo an paroyan na nag-abot
sa P90,607,000 kaya ngani an nakatalaan na tawan nin prioridad kan
saindang agencia iyo an pagtabang sa mga paraoma na mapabakalan
nin baratong precio kan mga hybrid na banhi.
Sa report kan Regional Disaster Coordinating Council (RDCC) sa
Bicol nag-abot na sa 45 mil na familia an victima asin ini maabot
sa 250 mil na persona an afectado huli kan nakaaging calamidad.
An Camarines Sur na iyo an piglila ni “Unding” ipinahayag na nag-abot
na sa 28 an bilang kan mga binawian nin buhay asin 15 an mga
nawawara na mga parasira sa Pasacao, Camarines Sur.
An pinakahuring nakoa nang mga bangkay huli kan makusog na duros
sa Lake Bato na nagkaralamos pigbistong sinda; Clarita Tuyay,
Rodolfo Awa, Ramon Roxas asin Otelio Bagasala, gabos kan Balatan,
Camarines Sur asin si Godofredo Pabig kan Nabua, Camarines Sur.
Mientras tanto, si Bicol PNP Regional Director Restituto Mosqueda
nagpahayag na an RDCC an nagtagama nin tig-a P10,000 na cash na
asistencia sa mga familia kan binawian nin buhay kan nakaaging
calamidad.
Pig-asegurar na kan jefe kan PNP sa Bicol an fondo nganing
matabangan an mga familia kan victima.
