GMA mavisita sa Calabanga

MATAPOS kan pagviaje ni Presidente Gloria Macapagal-Arroyo sa Santiago, Chile sa pag-atendir kan APEC Summit an Camarines Sur na mahiwas si destroso huli kan bagyong “Unding” an pigtalaan na visitahon kaini ngonian na semana o kun dai man posibleng ngonian na aldaw asin an barangay Bonot, Calabanga iyo an enot na vivisitahon.

An oficina kan Presidential Assistant for Bicol Affairs nagpahayag na kabali an Camarines Sur sa vivisitahon ni Presidente Arroyo sa mga lugar na tinamaan kan bagyong “Unding”.

Alagad habo paman confirmaron na maderetso sa sinambit na barangay si GMA huli sa seguridad asin ta pig-aandam pa kan Presidential Management Staff an saiyang pagpasiring digdi sa Bicol.

Kasoodma an oficina ni Bicol PNP Regional Director Restituto Mosqueda an nag-aandam na kan seguridad sa biglaan na pagvisita ni Presidente Arroyo.
Mismo si Presidential Spokesperson Ignacio Bunye iyo an nagconfirmar sa prensa sa Malacañang na kabali an Camarines Sur na vivisitahon kan Presidente nganing maheling an situacion matapos kan makusog na bagyo na nagrapado sa Camarines Sur kan nakaaging Noviembre 19ng banggi.

Si Gobernador L-Ray Villafuerte an enot naman naglibot sa manlaen-laen na mga banwaan kan Camarines Sur sa paghatud nin mga relief goods sa mga afectadong familia kan calamidad.

Pigpahayag na si PGMA an igwa man nin darang ayuda sa mga afecdato kan sinambit na calamidad.

Matapos kan bagyo si Gobernador Villafuerte asin si Alcalde Jesse M. Robredo kan Ciudad nin Naga an magkasuhay man na nagdeclara nin state of calamity nganing magamit ninda an fondo sa calamidad sa pagtabang sa mga nadanyaran kan calamidad.