Nakasalvar ki "Unding"
dai pinalibre sa kasulo

CANAMAN, Camarines Sur - Matapos kan nakaaging calamidad sa Camarines Sur kan bagyong Unding sarong dai licenciadong auto repair shop sa banwaan na ini an enterong nadestroso kan matumtom nin kalayo pati na an anom na mga vehiculos mientras na pig-sikwal kan investigador an posibleng arson.

	NASULONG REPAIR SHOP NIN MGA VEHICULOS - Dai pinalibre sa 30 minutos na pag-arab adab nin kalayo. Huri nang nag-abot an fire truck hali sa Ciudad nin Naga. Nasa retrato si Fire Marshall PO3 Robert Praxidio nag-iinvestigar sa namamahala kan repair shop kun sain naggikan an kalayo.

An nasulong repair shop segun sa investigacion ni PO2 Robert Praxidio, fire marshal kan Bureau of Fire Protection kan local na gobierno kan Canaman an may kagsadiri pigbistong si Raul San Antonio na mayo sa sinambit na lugar kan masulo an shop kan Lunes (Noviembre 22) sa barangay Haring kan sinambit na banwaan.

Naglitong na gasera iyo an pigtutubodan na causa kan kasulo mientras na dai man naagapan tolos kan mga bombero kan LGU Canaman huli ta mayo man digdi nin sadiring fire truck envez gikan pa sa BFP kan Ciudad nin Naga.

Nangyari an marikas na paglila kan kalayo sa laog kan repair shop mga alas 10:45ng banggi na dai man tolos nakaapod sa telepono directa sa BFP sa Naga huli kan kawaran nin mga dial tone matapos kan nakaaging Unding.

Pigkakarkulo nin sobra sa dos milliones pesos an danyos kan kasulo kabali na an anom na mga vehiculos na pig-hihirahay sagcod nang sarong bago pang adventure na pigwalat sana an inabot nin kalayo.

Naglawig nin sagcod sa 30 minutos si arab-adab kan kalayo na huri naman nag-abot an mga bombero gikan sa Ciudad nin Naga.

Kulog payo pa an aatubangon kan maysadiri huli ta igwa pa siyang sisimbagon kan mga nasulong vehiculos na yaon sa laog kan saiyang repair shop.