3ng drug pusher arestado

CALABANGA, Camarines Sur - An haloy nang pighahanting kan Philippine Drug Enforcement Agency (PDEA) sa Camarines Sur na kapot nin dakulang mga sira na nagtutulak nin droga an nahulog na sa kamot kan pinagsarong fuersa kan awtoridad sa barangay Mangiring sa ginibong buy-bust operation, kan Noviembre 22, 2004.

An mga suspechado sinda; Ronaldo Guiriva y Teope, 36 kan brgy. Mangiring, Calabanga asin an mag-agom na si Antonio Canaman, Sr. 36, an esposa kaini na si Lilibeth Canaman y Avenido 32, parejong mga taga Ciudad nin Pasay asin nag-eerok sa Tamban, Tinamban, Camarines Sur.
Nasamsam sa saindang pignatatagoan na lugar iyo an 4.5 gramos nin shabu asin iba pang mga paraphernalla sa ilegal na droga.

An joint operation pigconducir kan PDEA asin Calabanga PNP sagcod na armado sinda nin search warrant na pig-issue kan corte nganing maarestar an mga suspechado.

An mga miembros kan awtoridad pinagnenotan ninda P/Chief Inspector Jonathan Galang asin P/Inspector Manuel Guisic kan Calabanga Municipal Police Station.

Nalalaom na sa Municipal Jail kan Calabanga PNP an tolong mga suspechado asin sinangatan nang caso sa pagbalga kan Acta Republic 9165.

Sa investigacion an tolo sakop kan saindang ilegal na actividad iyo an mga banwaan kan Tinambac, Calabanga, Magarao asin naglalaog pa sa Ciudad nin Naga. Igwa pa sindang kasabuat sa ibang mga pagtaraid na banwaan sa pagbariwas kan ilegal na droga.

Si Sr. Supt. Romeo Mapalo, Camarines Sur PNP Provincial Director nag-omaw sa miembros kan policia kan Calabanga asin PDEA nganing madakop an mga envuelto sa drogra mientras na saro sa saiyang prioridad iyo an campania contra sa droga huli ta iyo ini an causa kan mga criminalidad sa sarong lugar.