SSS dai masunod sa state of calamity

An mga cuarta kan mga miembros kan Social Security System (SSS) sa paagi kan saindang monthly contribution an padagos na pinupogol apesar na nagka-duwa nang veces pig-declara an region Bicol sa estado nin calamidad habo pang magtao kan calamity loan na beneficios kan mga empleados kan privadong sector.

Dakul nang mga miembros kan SSS an naghahapot sa oficina kaini digdi sa Ciudad nin Naga matapos mag-declara na an gobierno provincial kan Camarines Sur asin Ciudad nin Naga nin state of calamity huli kan bagyong Unding, alagad an sinambit na oficina an simbag kan mga empleados na naghahalat pa sinda nin orden gikan sa oficina central kun tutugotan na an calamity loan.

Nagkaduwa nang veces nagdeclara sa Bicol nin estado nin calamidad enot kan Mayo 18, 2004 si Presidente Gloria Macapagal-Arroyo, alagad an SSS matagas pa an panindugan na dai itao an beneficios kan mga empleados kan privadong sector.

Nagdududa na an mga empleados na bangkaruti na an SSS mientras na dapat mag-aprovetsar sinda na magamit an saindang beneficios hali man sana sa saindang sadiring cuarta sa pighuhulog cada bulan.

Kan Mayo 18, 2004 iyo si pag-agi kan Bagyong “Dindo” an Government Service Insurance System (GSIS) asin Pag-IBIG nagtao kan calamity loan, alagad an SSS habong makisabayan sa dai maaraman na dahilan.

Mentras tanto, an GSIS an nagconfirmar na liwat sindang matao kan calamity loan sa cantidad sanang P5,000 sa mga miembros kaini na regular nagriremiso an saindang agencia kan bulanan na premium contribution.

An pagtao nin calamity loan sa mga empleados sa sarong provincia o region nangyayari sana kun declarado kan Presidente kan Pilipinas asin kan LGU an state of calamity.