Resolucion kan CASURECO II BOD
Nagsugo magdeclara nin dividendo sa consumedores

An resolucion kan Board of Director (BOD) kan Camarines Sur II Electric Cooperative, Inc. (Casureco II) na talagang magdeclara nin dividendo o patronage refund sa mga miembros consumedores huli ta nagka-igwa nin net income na P10,109,295 kan nagtalikod na taon.

Ini an sustancia kan board resolucion na pigpadrenohan ni director Francis Divino B. Soler asin inaprovaran kan gabos na miembros sa ginibong board meeting kan Octubre 11, 2004.

Bako an matipid na paliwanag ni General Manager Antonio Borja sa Bicol Mail na an resolucion nagsusugo sa manijamiento na adalan kun kinakaipuhan magtao na kan dividendo o patronage credit o refund sa mga miembros.

Ini an paliwanag ni Soler matapos magluwas an halipot na informacion ni Borja na an resolucion iyo an pag-adal sa pagtao kan dividendo na dai niya pigdetalye na magdeclara na nin dividendo.

Dapat ipaheling ta sa consumedores na mamati ninda na sinda talagang kagsadiri kan cooperativa kun babarangaon sa 66,000 na miembros consumedores dikit sana-man na gatos an cantidad, sabi pa ni Soler.

Dai na-uyon si Borja kan pag-isyu kan mga dividendo huli ta an Casureco II dai pa ngani registrado sa Cooperative Development Authority (CDC) bilang stock cooperative asin mayo sa by-laws kan cooperativa an pag-baranga kan dividendo.

An simbag man ni Soler bako yan an rason, dapat dai na magtao nin kadificilan huli ta pig-aapod na ngani kitang cooperativa.

Igwa nang circular an National Electrification Administration (NEA) na puedeng magdeclara na nin patronage credit. Mayo man nin problema kun ipasunod na an resolucion kan junta kun hahalaton pa an pagparegistro sa CDA mahahaloy pa dai na kaipuhan maghanap nin problema.
Napag-araman kan ibang miembros kan junta na naghahanap sana nin dahilan an general manager nganing dai maimplementar an resolucion apesar na igwa nang dating NEA circular.

Mismo si APEC party list Representative Ernesto Pablo kan maging juespe de honor sa ginibong general membership meeting kan Octubre 2, nagsabi na an mga cooperativa nin corriente sa nacion considerado nang sadiri kan mga miembros huli ta pig-condoned na an milliones pesos na utang sa NEA.
Sa resolucion nagsasabi pa na dapat pag-adalan kan manijamiento kun pano an procidimiento kun puedeng mag-issue nin tsikie sa individual kan dividendo, ika duwa ipaheling sa electric bill ibawas na sana.

Tanganing maseguro nang marecibe si Soler nakatalaan na magpadreno nin resolucion sa sunod na board meeting nganing magtao nin talaan kun noarin itatao an mga dividendo.