Gov't hospital pigbabayaan na nin mga doctor. nurses

Ciudad nin Legaspi - Afectado na an servicio kan mga hospital kan gobierno huli ta pigbabarayaan na nin mga doctor asin nurses nganing magtrabajo sa abroad huli ta mas halangkaw an sueldo kun icocomparar digdi sa Filipinas.

Bako lang sa mga hospital envez pati na an kawaran na nin mga destinong doctor sa Municipal Health Office sa manlaen-laen na provincias kan Kabikolan.

An crisis na ini sa sinambit na mga profession dai pa natatawan nin solucion kan Department of Health (DOH) na pararejo an problema dawa sain na region kan satong nacion.

Sa entrevista kan Bicol Mail ki OIC Dir. Virgillo Ludovice kan DOH Bicol sa paagi nin telepono pigconfirmar kaini na sa Bicol Regional Training Hospital (BRTH) kulang nin nasa 15ng doctor asin dai pa kabali kaini an pagharali na kan ibang mga nurses na nakalarga na sa abroad.

Kabali sa mga kulang na nin destinong doctor iyo an mga district hospital asin sa rural health center.

Mayong maginibo an DOH Bicol envez an temporariong solucion si mga graduate asin nag-training sa hospital an pigreretiner muna na magpadagos kan saindang servicio, sabi pa ni Ludovice.

Sa Bicol Medical Center (BMC) sa Ciudad nin Naga pigpahayag ni Director Edgar O. Esplana na sa ngonian kulang na sinda nin 30ng doctor asin igwa nang mga nagharali nang mga nurses.

Igwang mga bagong doctor na matapos kan saindang training nakoa sana nin experiencia asin binabayaan na an hospital.

Pigconfirmar kan oficial kan DOH sa Bicol na si mga doctor na nagharali sa hospital an nagclase sa mga nursing school bilang pag-andam kan saindang credential sa pagtrabajo sa abroad na mas mahal an sueldo.

Sa kamugtakan kan BMC an sarong nurse dapat limang paciente an kaipuhan maatendiran, alagad huli ta kulang na sinda an pig-aatendiran mga 70ng mga paciente contra sa sarong nurse kaya ngani afectado na an servicio kan hospital, segun ki Esplana.

Sinabi pa kan jefe kan BMC na dapat mag-gibo na nin solucion an gobierno sa problemang ini huli ta ma-aafectaran an servicio kan DOH sa salud kan namamanuan Filipino.