Kalag sa Purgatoryo

PAGSUHAY kan kalag sa hawak nin tawo, iba-iba an dinadalaganan na destino; Diit an nakakasakat sa langit; dakul na numero an pasiring sa purgatoryo; asin dagman an nakakasurabag sa impiyerno!

Suwerte an yaon sa langit nin huli ta laen sa bakong mainit, gabos stateside an gamit,an kuwarto igwa pa nin pipe-in music.

Mamondo an estambay sa purgatoryo ta aldaw-banggi nakaluhod na ngonian sa parasang bote nin Pepsi na pinarasa kan mga taga-Coke ta, soboot, daug na sa sales. Saro pa, mahal na an kilo kan monggo kaya bawal na an pagpaluhod sa monggo kan mga kalag sa purgatoryo.

Kaherakherak an makatapsok sa impiyerno ta nakasaapog sa kalayo, daug pa an orig na bina-barbecue.

Rape, kidnap, hold-up, illegal drugs an mga hilig, kaya helinga, an mga kalag haros magsuhay na sa hawak.

Sobra sa kickback. Kaya man, maitomon an kolor kan kalag.

Five-six an negosyo. Kaya buhay pa, an kalag kastigado na. Kun matangang banggi, sa patio kan ermita naghehela nin bakal na kadena.

Igwa nin boot makiulay sa kalag sa paagi nin “spirit of the glass”. Tabi magpasaway ta tibaad an saimong ma-contact iyo an naglaog na espiritu ni Satanas.”’

Igwa nin kalag na sobra an pagkamondo. Kawasa kan mautsan, new moon an posisyon kan bulan. Dai pa ngani na-full moon, an biyudang magayon igwa na nin bagong agom.

Dai matakot sa kalag na nagmumulto. Tibaad boot ka lang tawan nin numero na matama sa lotto. Maglikay sa mga kalag na nagbabaraybasay sa barangay ta iyan mga parasungkit nin sinablay.

Masuwerte an mga Katoliko ta iyo sana an may sadiring kamposanto, an depository bank kan hawak nin tawo.

Nobyembre uno, aldaw nin mga gadan, diyan sa kamposanto an dalagan kan mga binayaan tanganing magsongko sa saindang nagtalikod nang mga mahal sa buhay.

An pagdalaw sa kamposanto kutana oras nin pagpangadyi para sa mga naghali. Alagad imbes toninong, sobra lugod an kariribokan ta laen kan surugalan asin irinoman, igwa pa nin makusog na sounds na nakakalising. An dai na sana iyo an ballroom dancing.

Duman sa itaas, si Satanas asin si San Pedro nakaisip na magbukas nin disco, kumpleto nin mga GRO, tanganing matawan nin alingalingan an saindang mga kabuhan. Tanganing mayo nin agrabyado an disco yaon sa boundary kan langit asin impiyerno.

Nagkaolay na sabay sindang mapagibo nin tinampo poon sa boundary sagkod sa saindang mga teritoryo. Sadiri an gastos, kanya-kanya an trabaho.

An pagpa-cemento ni San Pedro natapos tulos ta pinaagi sa rabus. An Filipino-Chinese Chamber of Commerce an naggastos.
Sa ibong na lado, ngalas si Satanas ta ubos na an budget, exceed na sa time limit, nasa kabangaan pa sana an project.

Kawasa man, an mga nag-implement kan concreting project mga taga-DPWH. An budget hali sa pork barrel ni Kabise!