Limbo protijido pa ni PD Latag

Pinapadificilan ni PNP Provincial Director Sr./Supt. Bienvenido Latag si Alcalde Jesse Robredo sa pagribay nin bagong jefe de policia kan Naga City Police Station nganing dai pa matukal sa puesto an saiyang kababayan na si P/Supt. Anacleto Limbo, kaya nagsayuma pang magpaluwas nin directiva ki P/Supt. Ramon Ranara na iyo na an magiging bagong jefe kan policia digdi.

Ini apesar na si Ranara iyo an napili kan mga miembros kan Saggunian Panlungsod asin kan alcalde na maging “fullfledged” na Chief of Police (COP). Nagpadara nang surat si Robredo ki Latag na sainda nang napili si Ranara nganing magribay ki Limbo.

Alagad envez na ipadara na kan provincial director an napiling magiging COP nagsimbag na maagi pa sa proceso an calificaciones sagcod nang aaprovaran pa kan Bicol PNP Regional Office sagcod nang maagi pa sa National Police Commission.

An ginigibong pagpa-ituk-itok ni Latag sa mga oficiales local kan Ciudad nin Naga pigtutubodan na iyo sana an paagi nganing si Limbo na parejo sindang Batangueño magpadagos na magtukaw sa puesto.

Na enot nang pigdesignar kan provincial director si Limbo na sarong nang “fullfledged” na COP, alagad napiritan na magsumiter nin limang mga nominees na oficial kan PNP nganing pilian kan jefe ejecutivo local huli kan mga pagtuyaw sa saiya mientras na an proceso sa pagpili kan COP maagi pa sa alcalde base sa provicion kan local government code.

Nagpatanid na si Robredo na masurat na sana siya ki regional Director Restituto Mosqueda nganing iyo na an mag-accion kun tuyong pig-aabala kan pamayo kan policia sa Camarines Sur.

Kan mag-aparesir sa session kan Sanggunian Panlungsod si Deputy Provincial Director P/Supt. Nestor Pastoral komo kabali sa mga candidatong COP pigpaliwanag kaini sa mga oficiales kan City Hall na sindang mga nominees na kinababalihan ninda: P/Supt. Raul Hebrio, P/Supt. Ramon Ranara asin Chief Inspector Alfredo Consomeno gabos calificado.

Kan makapili na si Robredo, an sabi kan provincial director ririkisahon an mga calificaciones ni Ranara.

Pigpaliwanag pa kan Deputy Provincial Director na an mga candidatong COP sa ciudad sosog sa pigpapasunod kan Napolcom na dapat nagtapos sa PNPA, nagtapos kan masteral degree asin graduate sa directorial staff course.

“We are all qualified”, kaya ngani iyo an pignominar kan provincial director an sinambit na mga oficial kan PNP, sabi pa ni Pastoral.