LMP masuporta sa pigtutulod na
dagdag na buis ni Pres. Arroyo

An League of Municipalities of the Philippines (LMP) andam na maghaman nin resolucion na nag-mamanifestar kan pagsuporta sa pagpasar nin bill para sa walong revenue measures ni Presidente Gloria Macapagal-Arroyo.

Alagad masuporta sana an LMP sa pagpasar nin bagong buis sa dai indirectang makakaafectar sa kapobrehan siring kan cigarillo asin arak.

Si Alcalde Mel Gaite kan Baao, Camarines Sur asin iyo an Vice President for Luzon kan LMP national nagsabi na ngonian na aldaw magkaka-igwa sinda nin miting sa Cebu tanganing orolayan an pagpasar kan sinambit na resolucion.

An saiyang panindugan dapat dai favoran an walong revenue measures ni GMA envez an dapat ipasunod kan Bureau of Internal Revenue (BIR) iyo an mahiwas na coleccion sa buis asin halion an curapcion sa gobierno na haros 50 por ciento an nakukurakot sa fondo kan gobierno.

An Union of Legal Authorities of the Philippines (ULAP) an nagfafavor sa pigtutulod na pag-imponer nin dagdag na buis ni GMA asin mala ngani mahaman nin resolucion na ipapadara sa congress na sinda mayong naheheling na kaulangan huli sa inaatubang na crisis financial kan gobierno nacional.

An ULAP iyo an nakakapayong kan organisacion kan gabos na mga liga kan gobernador, bise gobernador, board members, alcaldes, consejales, asin kan Sanggunian Kabataan.

Dawa na ngani igwa nang enot na mga pahayag si ULAP spokesman asin Eastern Samar Governor Ben Evardone na suportaran an kahagadan ni GMA, alagad dai paman ciertong susuportaran ini kan LMP huli ta kaipuhan helingon na marhay kun an ma-uuntolan man sana sa pagsingil nin dagdag na mga buis iyo an mga kapobrehan.

Mientras tanto, dinagdag pa kan pamayo kan LMP Camarines Sur chapter na igigilid na ni GMA an pag-gunting kan internal revenue allotment kan mga Local Government Unit. An ULAP an pusog na nagcontra digdi huli ta mapaparalisar an mga LGU mantang ta kadakli sa sainda an naglalaom sa IRA.