NFA surog kan mga paraoma

IGWA nang suporta an campania kan National Food Authority (NFA)contra sa planong pagtunaw kan agenciang ini o isa-privado huli ta bako man pag-ganancia an saindang katuyohan envez servicio sa paagi nin pagpabakal nin baratong preciong bagas asin halangkaw na precio kan paroy na binabakal sa mga paraoma.

An Damayan nin mga Paraoma sa Camarines Sur (DAMPA-CS) sa sarong tiripon ipinasabot ninda sa miembros kan media sa paagi kan mga sadit na placards na saindang pigbiklad pigcocontra an pagsa privado kan NFA.

Si Feliciano Azucena, presidente kan DAMPA sa Camarines Sur asin iba pang grupo nin mga paraoma nanindugan na dapat dai na pakiaram ni Presidente Gloria Macapagal-Arroyo an NFA asin dai ibali sa mga Government Owned Controlled Corporation (GOCCs) na dapat sarahan huli ta nalulugi.

Dakulang tabang an NFA sa mga paraoma huli ta nagbabakal nin halangkaw na precio cada kilo kan paroy mientras na sa mga privadong comprador siring kan Cosay Enterprises an mas hababa an precio.

Si NFA Provincial Manager Bernardo Asetre, enot nang naglibot sa mga LGU sa Camarines Sur sa paghagad nin suporta asin nagkapera nang mga Sanggunian Bayan kabali na an Sanggunian Panlungsod kan Ciudad nin Naga an nagpasar nin resolucion na naghahagad ki Presidente Arroyo na dai na pagpakiaraman an NFA na dakulang tabang sa sector nin mga paraoma.

Nagbabakal nin mas halangkaw na precio kan imported rice an NFA alagad pinapabakal sa hababang precio kaya dai man dapat laoman kan gobierno na mag-ganancia nin milliones pesos.

Ini iyo pa an responsable sa pagmantenir kan food security sa nacion na ferming nakaandam kun iguang calamidad sa paagi kan saindang tambak na stock nin bagas asin paroy.
--------------------------------------------------------------------------------------------------------------
AN BAGONG “BICOL EPIC”

SI Ethnologist Dr. Zeus Salazar (too) pigpresentar an saiyang libro “Liktao at Epiko” sa miembros kan media durante sa ginibong paglansar kan Lunes sa Holy Rosary Minor Seminary. Si Salazar, reconisido sa ibang nacion bilang ethnologist gikan sa Tiwi, Albay, nagbuyagyag sa saiyang libro kan tunay na estoria kan bantogan na Bicolanong Epiko Ibalon an nasa Camarines Sur base sa saiyang pag-research kan “burial jar” na nakoa sa Libmanan, Camarines Sur kan enot na mga taon kan 700 A.D. Nasa retrato (wala-too) si Dr. Lilia Realubit asin HRMS Rector Fr. Peter Beriña.