Sa 9th ID
Medical mission bakong vs NPA

PILI, Camarines Sur - An 9th Infantry Division kan Philippine Army sa Bicol sa pamamayo ni Major General John Bulhayon nagsabi dai naka-ulang sa saindang operacion kaidto sa paghanap kan duwang nabibihag na soldados kan gobierno, nagpadagos man kan mga Medical and Dental Civic Action Program sa Camarines Sur asin Camarines Norte sagcod na nag-abot sa 12,121ng mga Bicolanong an mga naging benificiado kaini.

Sa mainit na mga operacion kan soldados kan Julio asin Agosto an mga medical mission pigconducir sa mga banwaan kan Tinambac, Calabanga, Sipocot, Lupi, Ragay, Del Gallego, sakop kan Camarines Sur asin sa Camarines Norte na servihan an mga barangay kan Labo, Jose Panganiban asin San Lorenzo Ruiz.
Ngonian na panahon kan Peñafrancia fiesta an mga soldados kan 9th ID an katuwang kan PNP nganing magtabang sa pagmantenir kan pace orden mientras na rinibong devotos ni Ina an yaon sa Ciudad nin Naga.

Si Bulhayon nagsabi na dawa ngani kasabay kan saindang mga medical mission iyo an paghanap kan saindang kaibahan na sinda Lt. Ronaldo Fidelino asin PFC Ronnel Nememio dai man na-afectaran an mga pag-iriba kan duwang mga pigbihag sa Tinambac, Camarines Sur. An duwa pinalibre kan Agosto 18.
Parte na iyan kan trabajo kan soldados kaya ano man nindang mga programa kun igwang mga combat operation igwa man nin operacion sa pagtabang sa mga civilian sa paagi kan sinambit na medical mission.

An Civic Action liwat nindang ipapadagos sa mga masunod na bulan mientras na bako lang sa campania contra sa insurgencia an saindang mission sa Bicol envez magtabang sa pobreng residentes kan barangay, sabi pa kan oficial kan militar.